कीर्ती मराठे - जेव्हा आपापल्या आयुष्यां...

जेव्हा
आपापल्या आयुष्यांमधले
चांदण्याचे संदर्भ बदलायला लागतात
तेव्हा समजायचं
की प्रवास मध्यावर आलाय
कुणाला चांदण्याची सोबत
कुणाला सोबतीचं चांदणं

खरं तर
आशा-निराशा, यश-अपयश
अपेक्षा नि अपेक्षाभंगाचे
उभे-आडवे धागे गुंफताना
या धाग्यांतच गुरफटायचं
की दोन पावलं मागं सरून
एखाद्या कसबी कलाकाराच्या नजरेनं
हा चांदणंपट तटस्थपणे न्याहाळायचा
हे ज्याचं-त्यानं ठरवायचं

एक मात्र खरं
की ज्याला न्याहाळणं जमलं
त्याच्यासाठी
पुढचा प्रवास म्हणजे....
आकाशगंगा