अविनाश पाटील - माझ्या घरासमोर उठला आहे ए...

माझ्या घरासमोर उठला आहे एक टॉवर
माझ्या घराच्या खिडकीतून
दिसणारं निळंशार आकाश
त्यानं गिळून टाकलयं !

समोरच्या अंगणात असलेली
शेवग्याची चार झाडं
पांढर्‍याशुभ्र फुलांनी डवरलेली
सरळमार्गी शेंगांनी नम्र झालेली
धारातीर्थी पडलीत...

या झाडाच्या फांद्याफांद्यांवर
बागडणार्‍या खारूताई
आता कुठं परदेशी गेल्या आहेत जणू
सासरी गेलेल्या लेकीसारख्या !

टॉवरच्या बाल्कनीत दिसतात आता
वाळत घातलेले
चित्र - विचित्र कपडे
किंवा
सुकण्यासाठी
पसरून खाली सोडलेल्या
रंगीत साड्या

भन्नाट वारा, झिम्माड पाऊस
आता कधी येतो, कधी जातो
कळतच नाही

कारण, खिडक्यांत कोंबलेल्या एसींनी
तोडून टाकलेत नातेसंबंध
कोवळ्या उन्हाशी !

एखादा चुकार पक्षी दिसावा म्हणून मी
कधीचा आसुसलेला आहे
या अनोळखी शहरात
मनाच्या फांदीवर
झोके घेत पक्षी होऊन !