चारुता पेंढरकर - ‘ खूप चोर्‍या होतायत हल्ल...

‘ खूप चोर्‍या होतायत हल्ली
दार तेवढं लावून घे
ओळख पटल्याशिवाय
दार उघडू नकोस
आत कुणाला घेऊ नकोस ’
असं सांगून निघून गेलास...

तेव्हापासून
सारी कवाडं बंद केल्येत मी

दाराला अगदी फटसुद्धा न ठेवता
अशीच बसून राहिल्येय
फक्त ओळखीची वाट पाहत

कुठूनसा आला पायरव
म्हणून
दार सताड उघडलं
तर तूच आला होतास
पण
अनोळखी प्रदेशातून आल्यासारखा
अगदी अनोळखी होऊन !

मग सांग,
आता तुला तरी
आत कसं घेऊ ?

दार उघडं ठेवू ?
की  
बंद करू ?

तूच सांग...!