रेखा खराबे - काल कुठंतरी सही करताना मा...

काल कुठंतरी सही करताना
माझं मलाच कळेनासं झालं

ते नाव, ती अक्षरं
अनोळखी, अपरिचित
वाटत राहिली

‘ मी कोण ? ’ ‘ माझं नाव काय ? ’
हे मी सगळंच विसरून गेले आहे की काय ?

त्या कागदावरची नक्षीच फक्त
निरखत राहिले मी...वेड्यागत

तंद्रीतून भानावर आले
ती काहीशी दचकतच
आणि काहीशी आनंदातही !

दचकत अशासाठी, की
आजवर कैक नात्यांच्या गुंतवळीत
विसररूनच गेले होते मी माझं अस्तित्व

आणि आनंदात अशासाठी, की
‘ मी कोण ? ’
‘ माझं नाव काय ? ’
असे निदान प्रश्न तरी पडायला
आता सुरवात झाली आहे... !