मनीषा वाणी - बरं झालं देवा, दिली एक कन...

बरं झालं देवा, दिली एक कन्या
तिच्यामुळे मला कळली ही दुनिया

तुरूतुरू चालताना बोलायचे पैजण
शोधा आली घरा, तिनं फुलवलं अंगण

बोबडे तिचे बोल, तिचे केस भुरूभुरू
बाबा आनंदून म्हणती, किती लाड करू ?

वाढू लागली लेक, झाली माझी आई !
काढू लागली चुका...म्हणे ‘ तुला कळत नाही ’ !

घरभर फिरत असते, खूप तिची बडबड
‘ मदत करते तुला ’ म्हणत करते किती गडबड !

येता - जाता घरात मला मारत असते मिठी
सदान्कदा नाव तिचेच माझ्यासुद्धा ओठी

खरंच का ही लेक कधी जाईल मला सोडून ?
नुसत्या विचारानंसुद्धा कंठ येतो दाटून !