डॉ. सुनील लोंढे - शहराच्या मध्यवर्ती ठिकाणी...

शहराच्या मध्यवर्ती ठिकाणी भरलेले माणसांचे बाजार...
सुरकुतलेल्या चेहर्‍यांवर आशेचा किरण...
पिशवीत दशम्यांचं गाठोडं...
एका दिवसासाठी विकले जाणारे माणसांचे हे ढीग
का ते समजत नाही; पण या रस्त्यावरून जाताना
मनात उठतो कमालीचा गोंधळ
काहूर सुरू होतं विचारांचं...
विसरली जातात स्वत:ची सगळी सुखं

आशेनं पाहणारे अनेक डोळे
केविलवाण्या नजरेनं पाहणारे...
मला सवय आहे चेहरे वाचण्याची !
खूप चेहरे वाचले आजवर...
पण हे मजुरांचे चेहरे ?
मी अजूनही वाचतोच आहे ते...
त्यांची न संपणार्‍या दु:खाची लिपी...
राहिलेली पानं वाचताना
येत चालली आहे मला अनामिक अस्वस्थता...
कारण,
अखेरचं पान वाचत असताना
कुणीतरी वाचत असेल माझाही चेहरा...
कदाचित !