किरण दशमुखे - ज्यांचं केंद्रच स्थिर नाह...

ज्यांचं केंद्रच स्थिर नाही
ते वाढवू पाहतात आपला परिघ
अमिबानं केंद्र बदलत ठेवावं तसं
आपला आकार बदलत...
मी मात्र, माझ्या केंद्राशी ठाम जोडलेला;
परिघ विस्तारण्याची चिंता न करता
केंद्राशी बांधलेल्या त्रिज्येची नाळ
वाढविण्याच्या प्रयत्नात.
आपसूकच व्हावं लागतं
व्यास, जीवा अन् परिघालाही...
शेवटी कर्तृत्वाला सामावणारं वर्तुळ नसतं;
ते भेदून उरतं
परिघाबाहेरील वर्तुळाच्या प्रतलात
असीम स्वप्नांच्या उदयासाठी...