निर्मिती कोलते - शब्द त्याला वाहिले अन् सा...

शब्द त्याला वाहिले अन् साध्य केले काय मी ?
छापताना गाळलेला पोरका अध्याय मी !

साचलेल्या जिंदगीची चाललेली कौतुके...
वाहत्या पाण्यात कोठे सोडते हे पाय मी ?

शोध प्रश्नांची तुझ्या संभाव्य सारी उत्तरे
शेवटी उरणार जो, तो एकटा पर्याय मी !

तोडुनी फांद्या हजारो बांधला मी आसरा
सावलीच्या प्राक्तनाला लागलेली हाय मी !

जन्मभर माझ्या सख्याला स्पर्श माझा टोचला...
आणि मी समजून होते की मुलायम साय मी !

राग, मत्सर, लोभ...सारे एकवटले अंतरी
बदलणार्‍या मुखवट्यांचा बेगडी समुदाय मी !

बेरकीही वाटते मी, भाबडीही वाटते...
मात्र जी दिसते तुम्हाला तीच आहे काय मी ?

न कधी फुटलाच पान्हा, सोसल्या नाही कळा...
दुःख पोटाशी तरी कवटाळणारी माय मी !

पाठ माझी वेदनांचे बोचके सांभाळते...
अन् तिला सांभाळणारी शांत गोगलगय मी !