गोविंद केळकर - हा कुठून येतो वारा ? सारख...

हा कुठून येतो वारा ?
सारखा मला का छळतो ?
आगळा त्यातला गंध
मजपाशी केवळ उरतो

हा परिसर आहे नवखा
ही धूसर कातरवेळ
क्षितिज दूर आभासाचे
हा कुठवर चाले खेळ ?

अस्पष्ट जाणवे मात्र
गंधाशी माझे नाते
मी उभा स्तब्ध एकाकी
मग उगाच व्याकुळ होते

मी गर्द जांभळी छाया
भयभीत मनाच्या खंती
मी साद कुणाला घालू ?
अंधारुन आले भवती

अंधार जरा निवळाला
नीटशी दिसावी वाट
अल्वार पुन्हा बिलगावा
हरवलां गंध तो थेट !