योगेश अशोकराव हांडगे - राजकारणात यशस्वी होण्यासा...

राजकारणात यशस्वी होण्यासाठी नेमकं काय करावं लागतं ?
थोडसं वाकावं लागतं, थोडसं झुकावं लागतं,
चार पावलं मगंही सरावं लागतं
अन् आयत्या संधीची वाट पाहत राहावं लागतं
जो नाही कधी वाकला,
नाहीं कोणासमोर झुकला तो मुळासकट तुटला
अन् राजकारणातून तर कायमचाच हुकला.

राजकारणात यशस्वी होण्यासाठी नेमकं काय करावं लागतं ?
सत्ता सुंदरीमागे धावावं लागतं
धावताना मात्र संन्यासीपण भासवावं लागतं
भगवं वस्त्रही परिधान करावं लागतं
कधीकधी बेगडी गांधीपण आणावं लागतं
त्यासाठी खादीचं आंगडं घालावं लागतं
लक्ष मात्र कायमच खुर्चीवर ठेवाव लागतं

खरंच राजकारणात यशस्वी होण्यासाठी नेमकं
काय करावं लागतं ?
स्वकियांशी बंड करावं लागतं
मात्र बंडाला क्रांतीचं नाव द्यावं लागतं
खेकड्यासारखं वागावं लागतं
अन् त्यातून स्वार्थ साधावा लागतो
जनतेच्या भावनांशी खेळावं लागतं
मंदिर - मशिदीसाठी खोटं भांडावं लागतं
आश्वासनं भरघोस द्यावी लागतात
विकासाची थाप मारावी लागते
न केलेल्या कामाचं श्रेय लाटावं लागतं
प्रतिस्पर्धाशी कायमच झटाव लागतं
...आणि हे सर्व करतानाच
जनतेच्या खाल्ल्या मिठालाही थोडंसं जागावं
लागतं...
अन्यथा चाणाक्ष जनतेमुळेच सत्तेतून
पायउतारही व्हावं लागतं !