योगेश वैद्य - लाटांसरशी नशीब माझे जरा स...

लाटांसरशी नशीब माझे जरा सरकले होते
पायाखाली वाळू नाही, मला समजले होते

दुर्दैवाला कशी नेमकी वाचा फुटली होती...
माझ्यामागे कुठे कुठे जाऊन बरळले होते !

मेलो आहे, असे मलाही मुळी वाटले नाही
मला चटावर जिवंत असतानाच उरकले होते !

देहाचे गाठोडे घेउन मी पोबारा केला...
मी मेल्याचे माझ्यावाचुन कुणास कळले होते ?

माझ्या हक्काला हक्काची झोप लागली नाही
दुकान दुनियेने वशिल्याचे पुन्हा उघडले होते !

नशिबापाशी पुन्हा पुन्हा तो हिशेब मागत होता...
मला कळेना, नक्की त्याचे काय बिनसले होते !