विजय माळी - घामास भाव माझ्या कवडीदरात...

घामास भाव माझ्या कवडीदरात आहे
सडतो असाच कांदा माझ्या मळ्यात आहे

कांद्यास भाव नाही, कापूसही उठेना...
मेल्यास भाव येतो... ‘ तो ’ बुचकळ्यात आहे !

शेतात काय माझ्या शेळी चरून गेली ?
बापास जाण होती, ज्वारी खळ्यात आहे !

ओलीच लाकडे ही माझ्या चुलीत होती...
ओल्यासवे जळे मी...जगणे धुरात आहे !

लागे जिवास चिंता अन् रोगही पिकला...
तारावयास पाणी कुठल्या तळ्यात आहे ?

ढग कोरडाच होता एकेक, आसवांचा...
ही कोरडी सुगी मग माझ्या घरात आहे !

केली कधीच नाही पूर्ती वचन दिल्याची
आश्वासनेच देणे पण धोरणात आहे !