आरती देवगांवकर - इतकं काही बावरायला नकोय म...

इतकं काही बावरायला नकोय
मुळांसह नव्या जागी रुजताना...
मुळांबरोबर आलेली थोडी जुनी माती
मिसळून टाक नव्या मातीत...
मग रुजशीलच तू...

रुजायलाच हवं
बहरायलाच हवं तुला

तुला कल्पना नाहीये
किती खर्च, किती व्याप केलेत
तुला एका जागेवरून दुसरीकडं रुजवायला...

नको होऊस व्याकुळ जुन्या आठवणींनी
भेटतील इथंही नवे सगे - सोबती
लगडशीलही पुन्हा फळा - फुलांनी...

नशीब समज...
त्यांनी तुझ्या मुळांवर ऍसिड ओतलं नाही...!