डङ्कपुरावतंसरमण - श्रीकृष्णचन्द्रप्रभुस्तव:

भक्तिस्वर्गितरुं करास्तकमलं काम्यं सुमेष्वम्बया
भीतिव्रातहरं सुवर्णवसनं नम्यं निलिम्पव्रजे: ।
भृङ्गाम्भोदकचं वरप्रदनतिं रम्याखिलस्वाङ्गकं
वन्दे डङ्कपुरावतंसरमणं श्रीकृष्णचन्द्रं प्रभुम् ॥१॥
केनादीड्यपदं कृपाजलनिधिं केशानुकृन्नीरदं
दीनानुग्रहकृत्कृतार्थकलितं क्लेशाम्बुधे: पारदम् ।
मीनाशीसहजं कृतान्तभयहं नम्रेष्टसर्वप्रदं
वन्दे डङ्कपुरावतंसरमणं श्रीकृष्णचन्द्रं प्रभुम् ॥२॥
एणाङ्कक्षयकृन्मुखं प्रणमताभीष्टब्रजश्राणकं
शोणाम्भोजपदं घनच्छवितनुं कष्टावलीकृन्तकम् ।
एणोक्षीसहितं सुवर्णमुखराशीष्टत्वदाङ्घ्रिस्मृतिं
वन्दे डङ्कपुरावतंसरमणं श्रीकृष्णचन्द्रं प्रभुम् ॥३॥