श्रीक्षोणीवराहस्तोत्रम्

राजीवशैलतनयासहजन्मगात्रौ
क्षान्ताङ्घ्रिपङ्कजनताखिलमन्तुपूगौ ।
नैजाक्षरात्मविशदीकृतिदक्षमन्त्रौ
क्षोणीवराहवपुषौ कलयामि चित्ते ॥१॥
क्षोणीमुखाखिलचतुर्दशलोकनाथौ
क्षोणीपतित्वमुखदायकपादपूजौ ।
व्यासात्मजादिमुनिकीर्त्तितपादपद्मौ
क्षोणीवराहवपुषौ कलयामि चित्ते ॥२॥
क्षान्ताङ्घ्रिपङ्कजविनम्रकृतापराधौ
शान्त्यादिषङ्गुणमणिस्पृशिचुञ्चुकीर्त्ती ।
सर्वाङ्गसम्बलितयोगवितारिपूजौ
क्षोणीवराहवपुषौ कलयामि चित्ते ॥३॥