श्रीचन्द्रकुबेरस्तुति:

भीतिजालभञ्जकौ भजन्निलिम्पपादपौ
हस्तधूतनीरजौ भुजङ्गभोगि [ ग ] कुन्तलौ
इष्टदानतत्परौ शरद्घनाभवाससौ
विप्रवंशनाथयक्षनायकौ विभावये ॥१॥
सत्त्वरम्यचेष्टितौ प्रणम्रसर्वकाम्यदौ
देवनम्यपादुकौ नमत्कृतान्तवारकौ ।
आनमत्कृपाम्बुधी गिरीशसेविसेवितौ
विप्रवंशनाथयक्षनायकौ विभावये ॥२॥
स्वर्णमुख्यभोग्यदौ तिलोत्तमादिसेवितौ
नम्रकाङ्क्षितप्रदौ शौनकादिसंस्तुतौ ।
नीरदातृकुन्तलौ भवाम्बुराशिपारदौ
विप्रवंशनाथयक्षनायकौ विभावये ॥३॥
नम्रपापनाशकौ सुन्दराननस्मितौ
पङ्कजातलोचनौ समस्तशास्त्रबोधदौ ।
विप्रचित्तवर्ष्मभूनैजसोदरादृतौ
विप्रवंशनाथयक्षनायकौ विभावये ॥४॥