श्रीक्षमादेशिकेन्द्र - श्रीतोटाकाचार्यस्तुति:

गुरूत्तंसमोदप्रदस्वीयवृत्त -
प्रभावीपलब्धाखिलज्ञातृभूयम् ।
भवाम्भोधिमग्नानमत्पारदाङ्घ्रिं
भजे तोटकार्यं क्षमादेशिकेन्द्रम् ॥१॥
कृताचार्यपादाम्बुजस्तोत्रवृत्ता -
भिधानोल्लसत्तोटकाचार्यसंज्ञम् ।
विनम्रावलीपापसंघातदाहं
भजे तोटकार्यं धरा ( क्षमा ) देशिकेन्द्रम् ॥२॥
अतिहृदयंगमत्वविलसन्निजाकृतिमनामुखाङ्गनिकरा -
न्क्षितिधरशीर्षपूगविलसत्किरीटमणिकोटिभाञ्चितपदान् ।
क्षितिगुरुशंकरार्यभगवत्पदाब्जर ( न ) तिलब्धशास्त्रनिकरा -
न्क्षितिगुरुतोटकाचार्यचरणान्भजामि सततं मुमुक्षुशरणान् ॥३॥
वितुलविमुक्तिसंज्ञाललनाललामरतिसक्तनैजमनस:
प्रणवमुखाप्यपूर्णपुरुषप्रबोधकलनापटुस्वचरणान् ।
प्रणवजपादिसक्तहृदयाम्बुजातजनदृष्टितुष्टहृदया -
न्क्षितिगुरुतोटकार्यचरणान्भजामि सततं मुमुक्षुशरणान् ॥४॥