भावगंगा - श्रद्धेने बुद्धीने समजून घे

श्रद्धेने बुद्धीने समजून घे
आतील प्रभुस्पर्श जाणून घे ॥धृ॥
जीभ ओली राहते का ? ठेवीतो कोण ?
खातो ते पचते का ? पचवीतो कोण ?
प्रेमाचा प्रवाह समजून घे ॥१॥
झोप दिली कोणी ? अन्‌ जागवितो कोण ?
भूक देऊनी सकलां पोषीतो कोण ?
पूजारी कोण खरा शोधून घे ॥२॥
लाल रक्त का बनते? बनवीतो कोण ?
शर्करा प्रमाण, लोह ठरवीतो कोण ?
अभिषेक देवाचा समजून घे ॥३॥
बत्तीस दातात जीभ मोकळी का ?
पंचेंद्रियांना विषयांची ओढ का ?
रचनेचे कौशल्य पिऊन घे ॥४॥
वासना विकार यास नाचवितो कोण
उनाड मनास आवरतो कोण ?
आतील शिवास जिंकून घे ॥५॥