भावगंगा - स्वाध्याय मी करणार

प्रभुचा मी होणार, सदोदित स्वाध्याय मी करणार ॥धृ॥
दृष्टी विधायक येते त्याने
घडती सुघटित भग्न जीवने
सुख-दुःखाला विसरुन जगणे
शिकवुनि उद्धरणार! सदोदित स्वाध्याय मी करणार ॥१॥
भाव पुरवितो ज्ञानामध्ये
तेज आणितो भक्तीमध्ये
गुंफण नुरवी धर्मामध्ये
रूढी बदलविणार! सदोदित स्वाध्याय मी करणार ॥२॥
दांभिक-वृत्ती दूर सारितो
मरण-भीतिला समूळ नाशितो
मंगलमय मृत्यूला करतो
अविरत प्रिय करणार! सदोदित स्वाध्याय मी करणार ॥३॥
आत्मनिरीक्षण-प्रेरक होतो
भगवंताची भेट घडवितो
जीवन सगळे सुसह्य करतो
भुक्त मुक्त करणार! सदोदित स्वाध्याय मी करणार ॥४॥