रमावल्लभदास

मुळीं लागतां सहज । मायबाप नाहिंत मज ॥
झालों पोसणें संताचें । मन कोंवळें तयांचें ॥
गोत्र अगस्ति होतें साचें । आतां गोत्र व्यापकाचें ॥
ऋग्वेदी होतों पहिले । आतां भागवती वहिले ॥
नामघोषाचा आचारु । श्रीमद्नीतेचा विचारु ॥
पूर्वीं संध्या ते त्रिकाळ । प्रेमसंध्या सर्वकाळ ॥
पूर्वीं गुरु तो मतभेदी । आतां मत जी अभेदी ॥
पूर्वी बोलिलों लौकिक । आतां बोलें अलौकिक ॥
पूर्वीं मान म्यांच घ्यावा । आतां मान सर्वां द्यावा ।
पूर्वीं रुचे चतुरपण । आतां भोळीव आपण ॥
पूर्वीं मुक्तीलागीं बाहे । आतां तारक मजला करी ॥
पूर्वीं होतों परतंत्र । आतां सर्वांशीं स्वतंत्र ॥
पूर्वीं रुचे रूप नाम । आतां नाहीं त्याचें काम ॥
नामरूप जाउनि भास । अवघा रमावल्लभदास ॥