तुटलेले दुवे - वर्षें सत्तर लोटलीं, अजुन...

वर्षें सत्तर लोटलीं, अजुनिही स्वातन्त्र्य रक्षावया
शस्त्रें घेऊनिया जुनाट अपुलीं ये ‘रास’ वेगें रणीं,
शत्रू फार सुसज्ज, शोधक नव्या साहयास विद्या तया,
कैचा हा टिकणें ? करी तरि बळें युद्धास अङगेजणी.
झालें कोसळला रणावर पहा झुन्जूनि सावेश हा,
त्याला देतिल बण्डखोर पदवी त्याचे अता बान्धव.
ये चैतन्य पुढे कधीतरि तदा घ्यातील यातें अहा !
हा निन्दास्तुतिच्या रिघे पलिकडे, मी खिन्न याच्यास्तव.
घे घेऊनि सुधारणासुख मला, सोयी तर्‍हेच्या किती !
वाटे हाय ! परन्तु हीन दुबळें ओशाळवाणें जिणें.
धोक्याचें पुरवेल कष्टद जिणें जे अफ्रिडी भोगिती -
वाटे स्त्रैणच हा सुशिक्षितपणा त्या क्षात्रतेजाविणें !
नेटाने असहाय रे झगडतां स्वत्वार्थ तू सङगरीं !
माझी वान्झ सहानुभूति, कुढतों मी माझिया पञ्जरीं.

२२ नोव्हेम्बर १९३७