तुटलेले दुवे - प्राणी कोण कुठील हा कुणिक...

प्राणी कोण कुठील हा कुणिकडे ऊटीमधे चालला ?
बेटयाचा नुसता दिमाखच पहा. दारिद्य याला वरी,
श्रेष्ठाची न कुठे भलावण न वा आप्तत्व, ना चाकरी.
हा प्रेमाळ कवी तशांत, नकळे कैसा असावा भला ?
आहे प्रेमच एकला विषय तत्काव्यांत बोकाळला.
वाचा आणि पहा किती बहकली ती भावनावल्लरी,
सौन्दर्यावर सक्त सन्तत अशी ती कल्पना नाचरी,
ये विश्वास न - कालिदासहि असो - प्रेमी कवीचा मला.
वेडा जीव निसर्गभक्त असला घ्यावा कसा मन्दिरीं,
कोणा कानगुजेल काय ? न कळे कैसा करी यत्न हा,
प्रेमाचीहि विचित्र नीति म्हणती - आहे जरी रत्न हा
मेल्यानन्तर कीर्ति धारण करो याला सुखाने शिरीं.
ऐकालाहि न कां दिसे तरुण हा निर्भीड साधा गुणी ?
काव्यीं अमृत कां दिसे न ? गणिती रङगेल कां वारुणी ?

१६ सप्टेम्बर १९२३