तुटलेले दुवे - आहे काय मनोरमे, तव जगीं स...

आहे काय मनोरमे, तव जगीं सौन्दर्य लोकोत्तर ?
तू सौन्दर्यसमीक्षकांस गमशी का मेनका, ऊर्वशी ?
भाळाहूनि तुझ्या सुरेख म्हणती दुर्गाष्टमीचा शशी,
अन ऐन्दीवर लोचनाहुनि तुझ्या शोभे निळें ठोसर.
द्यावा मान कसा न त्यांस असती जे थोर विद्वद्वर.
जे सौन्दर्यविभक्ति सूक्ष्म करिती निर्मोह न्याहाळुनी,
योग्य स्थान समर्पिती गुणमणी नानापरी चाळुनी,
विद्वद्रत्न न मी तरी तुज गणीं मी भक्तिने सुन्दर.
या लावण्यकलावती विलसती, जाय नको नन्दनीं,
होऊना परि हालचाल हृदयीं त्यां पाहतां द्दष्टिने,
वाटे एक तुझेंच रूप मजला त्रैलोक्यमोलागळें.
राज्ञी तूच म्हणून राहुं म्हणतों तूझ्याच मी बन्धनीं,
निस्सन्देह गमे अशक्यच मला तूझ्याविणें हें जिणें,
आहे काय अमूक मोहक तुझें अद्यापि हें नाकळे.

२ ऑगस्ट १९२९