चक्रासन *

(चित्र क्र. २८० ते २८३)
चक्र म्हणजे चाक. हे आसन करताना जमिनीवर पालथे पडा. दोन्ही पाय वर उचला. ते एकदम सरळ वर न्या. आणि डोक्यावरुन पलीकडे नेऊन हलासन करा. (चित्र क्र. २३९) हाताचे पंजे कानांजवळ ठेवा आणि डोके वर्तुळाकृती फिरवा. ही डोक्याची गती चक्राकार असते त्यामुळे हे नाव पडले आहे.
२. श्वास सोडा. दोन्ही पाय एकदम जमिनीवरुन उचला आणि ते डोक्यावरुन पलीकडे नेऊन पायांची बोटे हलासनातल्याप्रमाणे जमिनीवर टेका. (चित्र क्र. २३९) दोनदा किंवा तीनदा श्वास घ्या.
३. हात डोक्यावरुन मागे न्या. कोपरे वाकवा. आणि तळहात खांद्याच्या जवळ खाली टेकवा. हातांची बोटे पावलांच्या विरुध्द दिशेला रोखलेली असू द्या. (चित्र क्र. २८०)
४. श्वास सोडा. तळहात जमिनीवर दाबा. आणि पाय आणखी लांब ताणून मानेची मागची बाजू वर उचला. (चित्र क्र. २८१,२८२ आणि २८३) यांमध्ये दाखविल्याप्रमाणे डोक्यावरुन सबंध शरीर घरंगळत आणा.
५. हात सरळ लांबवा आणि अधोमुख श्वानासनामध्ये जा. (चित्र क्र. ७५).
६. कोपरे वाकवा. धड जमिनीकडे न्या. शरीर वळवून पुन्हा उताणे व्हा. आणि विसावा घ्या.

परिणाम
या आसनामुळे पोटातील अवयव आणि पाठीचा कणा यांना दृढता येते. चक्राकार हालचालीमुळे पाठीच्या कण्यामध्ये रक्ताभिसरण होते आणि त्याला नवजीवन लाभते. जठरविकार आणि मंद यकृत यांचा त्रास असणार्‍यांना हे आसन उपयुक्त आहे.