२७० .
आदिनारायण सद्गुरु आमुचा । शिष्य हो तयाचा महाविष्णु ॥१॥
तयाचा हो शिष्य जाणावा तो हंस । तेणे ब्रह्मयास उपदेशिले ॥२॥
ब्रह्मदेवे केला उपदेश वशिष्ठा । तेथे धरिली निष्ठा शुद्ध भाव ॥३॥
वशिष्ठ उपदेशी श्रीरामरायासी । श्रीरामे दासासी उपदेशिले ॥४॥
उपदेश देऊन मजला मारुती । स्वये रघुपती निरवीला ॥५॥
निरवितां तेणे जालो रामदास । संसारी उदास जीवेभावे ॥६॥
म्हणोनि आमुचे कुळी कुळदैवत । राम हनुमंत आत्मरुपी ॥७॥
आत्मरुपी जाला रामीरामदास । केला उपदेश दीनोद्धारे ॥८॥
२७१ .
भाविका भजन गुरुपरंपरा । सदा जप करा राममंत्र ॥१॥
राममंत्र जाणा त्रयोदश मात्रा । सर्व वेदशास्त्रां प्रगटचि ॥२॥
प्रगटचि राममंत्र हा प्रसिद्ध । तारीतसे बद्ध जडजीवां ॥३॥
जडजीवां तारी सकळ चराचरी । देह काशीपुरी धन्य जेणे ॥४॥
मंत्र हा तारक ओंकार स्वरुप । देत विश्वरुप मुमुक्षांसी ॥५॥
येणे मंत्रे जाणा मुमुक्षु सावध । साधक प्रसिद्ध सिध्द होय ॥६॥
सिध्द होय रामतारक जपतां । मुक्ति सायुज्यता रामदासी ॥७॥