निराशा - रात्र संपली, दिवसहि गेले,...

रात्र संपली, दिवसहि गेले,
अंधपणा ये फिरुनि धरेला,
खिन निराशा परि हृदयाला - या सोडित नाहीं.

नित्यापरि रविकिरणें देती
रंग मनोहर सांध्यमुखीं तीं,
खळबळ ओढा गुंगत गीती - राईंतुनि वाहे.

सुंदर सगळें, मोहक सगळें,
खिन्नपणा परि मनिंचा न गळें,
नुसती हुरहुर होय जिवाला - कां न कळे कांहीं !

चंद्रविंब धरि अभिनव कांती,
मेघ तयांनीं धवलित होती,
परि हृदयीं नैराश्यकालिमा - मम खंडत नाहीं !

भोवर्‍यांत जणुं पडलों कोठें,
स्वप्न भयंकर दिसतें वाटे,
जीवित केवळ करुणासंकुल - नैराश्यें होई !