ऐक सज्जना अरे मनमोहना संपत पाहतां कवणाची ॥
जाईल काया जाईल माया उसणी आणिली पांचांची ॥ध्रु०॥
कौरव गेले पांडव गेले वदली वाणी व्यासांची ॥
छप्पन्न कोटी यादव गेले काया उरली कृष्णाची ॥१॥
रावण ज्ञानि तो अभिमानी खंडे केली वेदांची ॥
तेहतिस कोटी बंदि घातले घडि घडि त्याला१ तो जाची ॥२॥
सूर्यवंशी राम जन्मला केवळ माय भक्तांची ॥
हनुमंतानें अब्धि लंघिला नगरी जाळिली सोन्याची ॥३॥
चाप-पांणी बाण वर्षे२ कुडी पाहसी३ बा त्याची ॥
रावणाची शिरें मोकळीं काग हो त्याला टोंची ॥४॥
अठ्यायशीं हजार ऋषिवर४ वार्ता हो मार्कंडेयाची ॥
चौदा कल्पें उष्ण सोशिलें नाही छाया गुंफ़ेची ॥५॥
लोमहर्षणा लोम५ झडे तैं संख्या पुरे आयुष्याची ॥
ऐसे ऐसे होऊनि गेले काय कथा हो अणिकाची६ ॥६॥
कितीक येती कितीक जाती घिरटी होते काळाची ॥
ज्यांचे गांठी पुण्य नाही यम हो त्यांला बहु जाची ॥७॥
सावध व्हावें भजन करावें भक्ति करावी देवाची ॥
आतां तरी ही७ गोष्ट आयका नारायण श्रीरंगाची ॥८॥
॥ऐक सज्ज०॥