ब्राह्मणी राज्य जोरदार घोड्यावर स्वार होते शिपाई ॥
जबर सद्दी कैकांनी पाहिली शत्रु ठेविले नाही ॥ध्रु०॥
श्रीमंत पेशवे प्रधान बहु प्रीतीचे ॥
अष्टप्रधानामध्यें उतरले मर्जीत महाराजांचे ॥
वसविले त्यांणी पुणें शहर टुमदारीचें ॥
जागो जाग बांधिले दाट नळ पाण्याचे ॥
ठायिं ठायिं शोभत हौद एक फ़र्म्याचे ॥
धनी कृपावंत प्रभु कल्याण करी रयतेचे ॥
लंकाच पुण्यामध्यें लेश न दारिद्र्याचे ॥
शहरांत घरोघर सावकार गबर घरचे ॥
सरदार एकाहुन एक श्रीमंतांचे ॥
लढणार शिपाई किती सांगू मी वाचे ॥
हत्ती घोडे रथ अंबारी थवे पालख्यांचे ॥
सरकार वाड्या भोवताली झुलती बहारीचे ॥
जागो जाग वस्ती भरदार गर्दि बाजार कमती नसे कांहीं ॥
पुणे शहर अमोलिक रचली अशि दुसरी नाही ॥ब्राह्म ॥१॥
उत्तम पुण्याभोंवती शोभती बागा ॥
शहरांत हजारो स्वार घोड्यांच्या पागा ॥
भले भले धनत्तर वाडे हवेल्या जागा ॥
आळोआळी झळकती एक सारख्या रांगा ॥
वर्णिता गोड वाटतें किती तरि सांगा ॥
शहरात सुखी अवघे क्वचितची भीकमागा ॥
तेही गेले कोठें धर्मास करिनारे जागा ॥
शिंद्याचा ज्यान बत्तीस फ़्रेंच नालुंगा ॥
गाईकवाड सरदार येती प्रसंगा ॥
धांवती रणांगणी मानकर्‍यांचा चुंगा ॥
शिरकेल कोणता काळ कोरण्या भुंगा ॥
(सहजात जिरविती सर्व तयांचा भुंगा ॥ )
गोखले बापू तरवार बहादर फ़ार लढाईंत जाई ॥
शत्रुची फ़ौज जर्जर करितसे लवलाही ॥ब्राह्म ॥२॥
साक्षांत विष्णु अवतार पेशवे कूळ ॥
संपूर्ण महीचे भूप कांपती धाक दरारा प्रबळ ॥
सखोपंत देवराव विठ्ठलनाना काळ ॥
शहाण्यात साडेतीन शहाणे (बुध्दीचे) सबळ ॥
सेवेत सर्वदा श्रीमंतांच्या जवळ ॥
होळकर भोसले शिंदे मानकरी सफ़ळ ॥
तलवार बहादुर करिती शत्रुची राळ ॥
स्वारीच्या भोवती पटवर्धन मंडळ ॥
युध्दांत रणांगणी जसा आगीचा लोळ ॥
बहुनामी पल्लेदार तोफ़ांचा कल्लोळ ॥
जे जाल जुंबुरे बाण करी वळवळ ॥
सरदार सभोंवती दाट पसरती तळ ॥
घोरपडे रास्ते सरदार पुरंदरे स्वार पानशे पाहीं ॥
फ़डणीस नानांची जरब भूमंडळी राही ॥ब्राह्म ॥३॥
पर्वतावरती पर्वती स्थान त्यावरती चौघडा ॥
तळापर्यंत पायर्‍या जावे धडधडा ॥
अनुष्ठान पंचपक्वान्न पडेना खाडा ॥
पुजारी पूजिती उमामहेश्वर जोडा ॥
पीत वर्ण सोन्याच्या मूर्ति नव्हे या बाडा ॥
पहार्‍यास शिपाई उभे पेटवुनि तोडा ॥
रमणाहि ब्राह्मणांसाठी बांधिला केवढा ॥
श्रावणमासि खर्च तो कोट्यावधि तोडा ॥
पुढे तळे त्यामध्यें लहान बेटाचा तुकडा ॥
गणपती त्यांत पलिकडेस आंबिल ओढा ॥
ग्रामांत तुळशी बागेत बेत ही जाडा ॥
बुधवार पेठ बेलबाग नजीकची वाडा ॥
जागोजाग मौज अनिवार नसे अंतपार वर्णू तरि काई ॥
कविराय म्हणे धन्य धन्य पेशवाई ॥
ब्राह्मणी राज्य जोरदार ॥४॥