श्री रामाचे पद - घडी घडी घडी घडी आठवतें रू...

घडी घडी घडी घडी आठवतें रूप तुझें रामा ।
जप जप जप जप नाम नित्य नेम प्रेमा ॥ध्रु.॥
झळ झळ झळ कीरटी कुंडल सरळ कुरुळ साजे ।
कोटी इंदू पूर्ण कळा मुख पद्मीं लाजे ॥१॥
मग मग मग टिळक भाळीं सुरेख मृग नाभा ।
झग झग झग दंतप्रभा कोटी सूर्य गाभा ॥२॥
घण घण घण च्यापघंटा लख लख लख तूणी ।
सर्व काळ भक्तपाळ शोभे सिंव्हासनीं ॥३॥
कंठमाळ रत्नमाळ पदक डोलतसे ।
तग तग तग तगीत पीत अंबर कासे ॥४॥
खळ खळ खळ आंदु वाकी शब्द नेपूराचे ।
ब्रह्मादिका दुर्लभ पदें, हदय कल्याणाचें ॥५॥