विठ्ठलनाथकृत पदें ६६ ते ६८

पद ६६ वें.

राधिकेचा रंग पाहुनि कृष्ण दंग जहाला  !॥ध्रुवपद.॥
वेणी फणी करुन भांग । काजल कुंकुं ल्यालि चांग ।
गोरे अंग चोळ तंग । दाखवी श्रीहरिला ॥रधि०॥१॥
राधिकेचा झकाझोंक । कृष्ण पाहुनि लावि नोक ।
जरीपातळाचा झोंक । पदर सांवरीला ॥रधि०॥२॥
कृष्ण पाहुनि झाली वेडी । हांसतांचि नेत्र मोडी ।
विठ्ठलनाथ भक्त गडी । चरणी रंगला ॥रधि०॥३॥

पद ६७ वें.

ढीग कासयासि करिसी जोग, लोक शीणवाया ॥ध्रुवपद.॥
देणें घेणें कारभार । लेवालेवी उदिम फार ।
कर्ज देउनि धरिसि द्वार । शेण कालवाया ॥ढीग०॥१॥
मंत्र, तंत्र, कळा जाण । आत्मरुपीं नाहीं ध्यान ।
विठ्ठलनाथ लावुनि वात । दीप मालवाया ॥ढीग०॥२॥

पद ६८ वें.

काय मना ! जना धना गुंतलासि लोभा ॥ध्रुवपद.॥
जन्ममरण नर्कद्वार । वासनेसि येरझार ।
विषय व्या संभ्रमांत फार । नाशिवंत शोभा ॥काय०॥१॥
विसरलासि शाश्वताचें ॥ नाम आत्मघाता ।
रतला कसा विठ्ठलनाथ । अंतकाळी तो बा ! ॥काय०॥२॥