विठ्ठलनाथकृत पदें ६३ ते ६५

पद ६३ वें.

जडदेह कसा घेउनि गेला तुकाराम वाणी ॥ध्रुवपद.॥
भजन पुजन भावबळें । जिंकियले कळीकाळ ॥
गर्जताति तिन्ही ताळ । ऐकताति कानीं. ॥जडदेह०॥१॥
पंढरिचा देव गडी ॥पाववील पैल थडी ॥
विठ्ठलनाथ गरिब गडी । त्यास कोण मानी ॥जडदेह०॥२॥

पद ६४ वें.

धिग ब्रम्हाबोध करुनि काय मूढ मानवाला ॥ध्रुवपद.॥
रात्रदिवस जोडि दाम । हृदयीं वसे तंव सकाम ।
नाठवितां रामनाम । देवदानवांला ॥धिग०॥१॥
बुडतयास देउनि हात । आपापणांसि करिल घात ।
विठ्ठलनाथ देउनि लात । सोडि पालबाला ॥धिरा०॥२॥

पद ६५ वें.

मजकडे आधिं निकट करुनि येइं पांडुरंगा !॥ध्रुवपद.॥
कलियुगीं बहूत दास । होसी दासां घरीं दास ।
माझ्या आयुष्याचा नाश । जात आहे भंगा. ॥मज०॥१॥
आसनि शायनिं मनीं ध्यात । तूंचि बंधुमायतात ।
विठ्ठलनाथ रसिक गात । नाम प्रेमसंगा. ॥मज०॥२॥