सांगवेदाध्यानाचा प्रकार सांगतो

उपाकर्म ( श्रावणी ) करून पूर्वी सांगितलेला जो विद्येच्या आरंभाचा काल त्या कालीं अक्षरविद्येच्या आरंभी जशीं विष्णु इत्यादिक देवतांची पूजा करण्यास सांगितली त्या प्रकारानें पूजा करून वेदाध्ययनाचा आरंभ करावा. * वेदाच्या अध्ययनाचे आरंभी आणि समाप्ति कालीं गुरूचें पादोपसंग्रहण ( गुरूचें चरण धरणें ) करावे. प्रथम ओंकाराचा उच्चार करून नंतर वेदाचे अध्ययन करून शेवटीं ओंकाराचा उच्चार करून भूमीला स्पर्श करून विराम करावा. रात्रीच्या पहिल्या प्रहरीं व शेवटच्या प्रहरीं वेदाध्ययन करावें. “ दोन प्रहरपर्यंत निद्रा करणारा ब्रह्मत्वाला पावतो ” गुरु, पिता, माता यांचा सन्मान ठेवावा, कधींहि द्रोह करूं नये. “ गुरुपाशीं अध्ययन केलेलें असें शिष्य वाणी, मन, कर्म यांनीं जर गुरूच्या सत्कार न करतील तर जसे ते गुरूला पालन करण्यास योग्य नाहींत तसे वेदही त्यांचें पालन करीत नाहींत; म्हणजे त्यांना ते वेद फ़लद्रूप होत नाहींत.