खण्डः ३ - अध्यायः १६८

मार्कण्डेय उवाच॥
चैत्रमासस्य सप्तम्यां शुक्लपक्षे नराधिप॥
गोमयेनोपलिप्ते तु मृदा कुर्यात्तु मण्डलम् ॥१॥
तत्राष्टपत्रं कमलं कर्तव्यं वर्णकैः शुभैः॥
कृतोपवासस्तन्मध्य भास्करं पूजयेन्नरः ॥२॥
अरुणं चैव दन्ताकं माठरं च तथा दमम्॥
यमुनां च यमं कालं द्वितीयं मनुमेव च ॥३॥
शनैश्चरं तथा राज्ञीं छायां रेवन्तमेव च॥
सप्तच्छन्दांसि वर्षं च द्यां च पिङ्गलमेव च ॥४॥
केशरेषु यजेद्वाथ पत्रेषूक्ताश्च देवताः॥
दिक्कालपूजनं कार्यं बहिः पद्मस्य पार्थिव ॥५॥
गन्धमाल्यनमस्कारधूपदीपान्नसम्पदा॥
व्रते समाप्ते दातव्यस्तुरगो ब्राह्मणाय च ॥६॥
प्राप्याश्वमेधस्य फलं यथावल्लोकानवाप्याथ पुरन्दरस्य॥
तत्रोष्य राजन्सुचिरं च कालं सायुज्यमायाति दिवाकरस्य ॥७॥
इति श्रीविष्णुधर्मोत्तरे तृतीयखण्डे मार्कण्डेयवज्रसंवादे सप्तव्रतकल्पे सप्तमीपूजाप्रशंसा नामैकोनसप्तत्युत्तरशततमोऽध्यायः ॥१६९॥