खण्डः ३ - अध्यायः ०५९

मार्कण्डेय उवाच
अथातो रूपनिर्माणं वच्म्यहं भैरवस्य ते॥
लम्बोदरं तथा कुर्याद्वृत्तपिङ्गललोचनम् ॥१॥
दंष्ट्राकरालवदनं फुल्लनासापुटं तथा॥
कपालमालिनं रौद्रं सर्वतः सर्पभूषणम् ॥२॥
व्यालेन त्रासयन्तं च देवीं पर्वतनन्दिनीम्॥
सजलाम्बुदसंकाशं गजचर्मोत्तरच्छदम् ॥३॥
बाहुभिर्बहुभिव्याप्तं सर्वायुधविभूषणैः॥
बृहत्सालप्रतीकाशैस्तथा तीक्ष्णनखैः शुभैः ॥४॥
साचीकृतमिदं रूपं भैरवस्य प्रकीर्तितम्॥
महाकालस्य कथितमेतदेव च सन्मुखम् ॥५॥
देवी तु वामतः कार्या करे कार्यस्तु पन्नगः ।
न चास्य पुरतः कार्या देवी पर्वतनन्दिनी ॥६॥
शुक्ला न कार्या न तथास्य रक्ता समीपतो मातृगणप्रधाने॥
कार्यस्त्वथान्यः परिबर्हमस्य गणाश्च कार्या बहुरूपरूपाः ॥७॥

इति श्रीविष्णुधर्मोत्तरे तृतीयखण्डे मार्कण्डयवज्रसंवादे भैरवरूपनिर्माणो नामैकोनषष्टितमोऽध्यायः ॥५९॥