चांदणे काय सुंदर पडले ।
त्यात तुम्हांसारिखे पाखरू अवचित सापडले ॥ध्रु०॥
लऊन किती पाया पडत्ये ।
काही करुणा येउद्या रात्री माशापरी तडफडत्ये ॥
एकांती दिसास चाल पडत्ये ।
तरी का बोलत नाही अशी कोठे तुम्हास आवडत्ये ॥
म्हणुन मी दैवाला रडत्ये ।
चैन पडेना जिवास चिंतानदीत नित बुडत्ये ॥चाल॥
पसरून पदर विषयाचे सौख्य मागत्ये ।
कोणी गाठ घालिना पलंगी उघड सांगत्ये ॥
चौघांची खुशामत करून व्यर्थ भागत्ये ॥चाल॥
सहजगती आज दर्शन घडले ।
समाधान पावले चित्त फारच स्वरुपी जडले ॥१॥
कीर्त ऐकुन खावंदांची ।
आरंभिली मग आशा स्वामिच्या पदारविंदांची ॥
घडी आली बनून आनंदाची ।
मुहुर्त साधा उठा नाही अडचण प्रतिबंधाची ॥
पुष्टता जशी गुलकंदाची ।
तशी काया समधात सुगंधिक अमोल फुंदाची ॥चाल॥
सोडित्ये गाठ कुचकंदुक सुंदर बघा ।
वर्तुळाकारति कठिण अहो जिवलगा ॥
घ्या मुके गोड कवटाळुन गळिच्या नगा ॥चाल॥
कोणाचे कार्य कोठे अडले ।
सिद्धिस न्यावे थोर जनांनी अनाथ अवघडले ॥२॥
त्रासला जीव घरच्या दुहिला ।
तशामध्ये पतिराज नित्य जातात उठुन कहिला ॥
आपण तरी भर भोगा पहिला ।
नाही मागत धन द्रव्य टाक नको लावाला वहिला ॥
द्यावे सुख ऋतुवंत्या महिला ।
लेख असा आहे पद्मपुराणी व्यासांनी लिहिला ॥चाल॥
असो पाप पुण्य सर्वही माझे मजकडे ।
तुम्ही अंगसंग देऊन व्हावे पलिकडे ॥
पुढे घडेल तसे घडो या लौकर अलिकडे ॥चाल॥
कठीण मन केले कोणी कडले ।
मघाच झाली तोफ सख्या वर आकाश गडगडले ॥३॥
स्वरुप लावण्य ह्रदई ठसले ।
पदकमळापासुन मुखापर्यंत जीवी बसले ॥
मुलायम चित्र कोठे असले ।
लिंबापरि तारुण्य विसा बाविसात मुसमुसले ॥
बहुत गोजिरवाणे दिसले ।
झडी पडुन भोगावे वाटते शरीर कसकसले ॥चाल॥
करू काय हाय का नये माझा कळवळा ।
आले नटुथटुनपोषाग करून पिवळा ॥
आली दया आलींगन देई प्रियकर सावळा ॥चाल॥
गंगु हैबतीस आवडले ।
महादेव गुणी प्रभाकर प्रारब्ध उघडले ॥४॥