मोहोनि जसी सुर सभेमधी अमृत वाढी करी ।
तशी नार पंगतित आग्रह करी ॥धृ०॥
नटनाटक कलियुगात ही आली राधा दुसरी ।
सगुण संपन्न कळा कुसरी ॥
सुख सोहोळे दोहोकडे होती अति मोहर सासरी ।
हुकूम झेलिती किति एक पासरी ॥
मर्यादेने राहती उभे घडोघडिच्या अवसरी ।
मिटाईन आणि मुंग्यामिसरी ॥चा०॥
चौकेर मांडुन पंगती ।
वाढी सजुन सख्या संगती ॥
पाहुन प्राणी गुंगती ॥चा०॥
पदार्थ जे मागती मुखे पुरवी त्यास लौकरी ॥
तशी नार० ॥१॥
गर्भश्रीमंतिण सहज जिचा सर्वांवर वारसा ।
हलवी रूप सुंदर आरसा ॥
चतुर स्त्रीयांची धनीन जसी ऐन आली भर रसा ।
कुणासवे शब्द नकरी फारसा ॥
डौलामधी लाजवी सदा आणुन हरी सारसा ।
बनलि जणू हळदिचा नारसा ॥चा०॥
दुधी कांचन झार्‍या भरून ॥
घ्या घ्या म्हणे आदरे करून ॥
हावभाव दावी पदरावरून ॥चा०॥
धरून सितेचे स्वरुप वनी भुलवी राम शांकरी ॥
तशी नार० ॥२॥
ठाई ठाई ठेवि दागिने तळी लगबगीत नावरी ।
शरिर सुकुमार की गुलदावरी ॥
विशालनयना शुभाननी चाले ठमकत बावरी ।
कुण्यातरी अमिराची नोवरी ॥
पात्र पाहुन उभी राहुन जरा नजर करी ज्यावरी ।
उजेड पडे चपळेपरी त्यावरी ॥चा०॥
लोकांस चंद्री लागली ॥
नाही शुद्ध मागली ॥
असो फार सुगर चांगली ॥चा०॥
स्वच्छंदामधी घाली वनी गुंजारव मधुकरी ॥
तशी नार० ॥३॥
नभरंगाचे वसन कटी निरी चोपीव नाफुटे ।
पदर पल्लेदार माग सुटे ॥
सतेज सरी शोभतीवरी दाट जरीचे बुटे ।
चमक जणू नक्षत्रांची सुटे ॥
धन्य धन्य निर्मिता विधि नाही विसरला कुठे ।
केवळ धगधगित तारा तुटे ॥चा०॥
गंगु हैबती कवी गावन ॥
लाविती बिर्दैबावन ॥ झाले महादेव गुणी पावन ॥चा०॥
प्रभाकराची कवन कडी गुणि जनास प्रिय करी ॥४॥