कारे मजवरी हरि कोपलासी ।
हात धुवुनि कसा पाठि लागलासी ॥ध्रु०॥
नाही सुख पाहिले कधी या जीवाने ।
कसी धाव घेतली दैवाने ॥
अंतर पडिले सांबशिवाने ॥चाल॥
काय आग लाऊ मी गोतगणाला ।
पाहू पलंगी सखे आता ग कुणाला ॥
लौकर पाठवा पतिला आणाला ॥चाल॥
मज घरी टाकुनी कोठे राहिलासी ॥१॥
दिवस पावसाचे आभाळ गडाडे ।
ठाई ठाई उठती विजांचे कडाडे ॥
पाहुनी काळिज माझे धडाडे ॥चाल॥
उद्या भरतिल नद्या देश दुरावा ।
खबर लागेना ग लोक परावा ॥
कुठवर आपुला जिव आवरावा ॥चाल॥
नवी नवती आली बहार फुलांसी ॥२॥
षड्रस जेविता घास पडे ग ।
श्रृंगार घालिता उमेदी चढे ग ।
खेळता गंजिफा येते रडे ग ॥चाल॥
ताईत कंठिचा प्राणविसावा ।
नवे तरणेपणी गृही का नसावा ॥
समाचार स्वामिचा कुणाला पुसावा ॥चाल॥
सुखास नये गडे सुगंध विलासी ॥३॥
मौज खुशालित रहाली कराची ।
सोडली आस मी भरल्या घराची ॥
आजवर पाहिली वाट वराची ॥चाल॥
म्हणे गंगुहैबती वाट मिठाई ।
घाल मिठी उठ पतिचे तु पायी ॥
महादेव गावन जाणते शाई ॥चाल॥
प्रभाकर गातसे सदा दिल खुलासी ॥४॥