भर महिना लोटेना चुकेना अजुन बाई पाळी ।
कधि ग होइन लेकुरवाळी ॥धृ०॥
घरंदाज कुळ शुद्ध प्रथम वर सुरूप पैकेपुर ॥
राजमान्य साहेब सुभेसरदार स्वता रणशुर ॥
परोपकारी रामउपासक लौकिक ज्यांचा दुर ॥चा०॥
अति योग्य असे मुळी पित्याने स्थळ शोधिले ॥
पाहुन घटित ठीक मज पदरी बांधिले ॥
फार फार पतीला बहुल्यावर बोधिले ॥चा०॥
केला चार दिवस सोहळा ॥
पुरला त्यांचा डोहळा ॥
जावई तो धन कोहळा ॥चा०॥
उतराई माझी मायबाप आपुण जाहली ॥
सोशिते दुःख मी हिकडे ती दूर राहिली ॥
करमेना मुलाविण सुनि दिसते माहली ॥चा०॥
गडे काय कपाळाला करू ॥
नाहि घरात एक लेकरू ॥
चोपले खंत करकरू ॥चा०॥
देह झिजला झुरझुरून घालिते नित जीव जंजाळी ॥१॥
तर्हेतर्हेचे उपाय जे जे कुणी काही सांगितले ॥
सर्व करून ते मान्य अनुग्रह साधुन किती घेतले ॥
विपुल धन देऊन तपाला पवित्र भट घातले ॥चा०॥
ऐकते परस्पर कठीण बद्रिकाश्रम ॥
पडे बर्फ तिथे ग कामनिक करती श्रम ॥
धर्मार्थ बसविले काशीस मठ आश्रम ॥चा०॥
उज्जनीमहंकाळ तो ॥ आले संकट त्वरे टाळतो ॥
का वृथैव मज जाळतो ॥चा०॥
धावण्या धाव ओंकार ममळेश्वरा ॥
नवशिले नवस वेरुळच्या घृष्णेश्वरा ॥
कधी हौस पुरवशिल सोरटी सोमेश्वरा ॥चा०॥
अरे नागनाथ आंवढ्या ॥ वासना मनी जेवढ्या ॥
तू तडिस ने तेवढ्या ॥चा०॥
आराधना केवढ्या मांडिल्या जपून तिन्ही काळी ॥२॥
वैजनाथ परळिचा चंद्रशेखर तो शिव आठवा ॥
भरून भागिरथीच्या कावडी रामेश्वरी पाठवा ॥
तिळ तांदुळ गहू तेल मलकार्जुनी नेउन साठवा ॥चा०॥
कर कृपा गौरिवल्लभा भिमाशंकरा ।
जा जा हो त्रिंबकेश्वरी कुणी सेवा करा ॥
नित प्रदक्षिणा सांगते अकरी अकरा ॥चा०॥
अग सप्तशृंगवासिनी ॥ पहावरद विघ्ननाशनी ॥
आला राशिस नकळे शनी ॥चा०॥
लाजविती मला बोलण्यात गरोदर स्त्रिया ॥
कोणती सुफल होइना आरंभिली क्रिया ॥
सांगता नये खुण कुठवर चोरू प्रिया ॥चा०॥
गळ टोचिनरे हैबती । वाहीन साहेब नौबती ॥
लागली देहा सरबत्ती ॥चा०॥
न कळे वांझ पती न कळे वांझ वाचले मी अगजाळी ॥३॥
अष्ट विनायक माहोर फिरले तुळजापुर जातिने ॥
कोल्हापुर जोतिबा सिधोबा ओवाळुन वातिने ॥
दिवाळिच्या अवसेस म्हसोबा लिंपुन गुळमातिने ॥चा०॥
राहिले पंढरीस चतुरमास जाउनी ।
गाई तुळस पिंपळाप्रति विनंत्या लाउनी ॥
धुंडिते दवाजाणते लगबग धाउनी ॥चा०॥
साधून साती आसरा ॥ झोटिंग बीर दुसरा ॥
मारुती मुंज्या तिसरा ॥चा०॥
शनवारी आणिला जरी आवतुन धोतरा ॥
निरमाल्य गमे नाही तेज कुण्या मंतरा ॥
हुरहुर करी जीव धीर नुपुरे अंतरा ॥चा०॥
गंगु हैबती कवी गर्जती ॥ संगीन वाद्ये वाजती ॥
महदेव शिष्य साजती ॥ रसिक म्हणे प्रभाकर म्हणे नार फार पडली शोक जाळी ॥४॥