प्राणसखे राजसे जिवाला लाविलिस झुरणी ।
करी तळमळ अंतःकरणी ॥ध्रु०॥
बिन पैशावाचून सुंदरी गाठ तुझी पडली ।
दिसंदिस मोहममता जडली ॥
घडाची ती तर गोष्ट बिछानी नाही कधी ग घडली ।
उगीच वरकांती नोक झडली ॥
श्रीमंतास जी असाध्य मजला ती वस्त सापडली ।
रूप आणि गुणाने आवडली ॥चाल॥
हा ऋणानुबंध पूर्व जन्मीचा खरा ।
लागल्या तेव्हा त्या गोष्टी गोड साखरा ॥
काही भिऊन चाल तरी मउ माषुक पाखरा ।
घातल्या मुखामध्ये प्रेमाने वैखरा ॥
वाटतो आता तो ह्रदयांतरी खरखरा ।
तू आहेस अंतर्साक्ष चंद्रशेखर ॥चाल॥
समाचार घेतलास देउन पदार्थ प्रियकरणी ।
होता सय रडतो अंथुरणी ॥१॥
तिसरे प्रहरी फराळास चोरुन पाठवावे ।
कोठे ते सौख्य साठवावे ॥
निजल्या असल्या येउन एकांती बळेच उठवावे ।
बोलणे कितीक आठवावे ॥
हळुच मागिलदारी कुटुंबाकडून गाठवावे ।
ऐक्यपण केवळ वठवावे ॥चाल॥
निष्कपट असा स्नेह दोघांचा असून ।
चालला घरोबा गडे पहिल्यापासून ॥
कधी देवघरामध्ये सोवळ्यात गवसून ।
टाकी अंगावर जळ किंचित हसून ॥काय काय खेळलो पलंगावर बैसून ।
ते स्मरण सखे करु नकोस जाऊ त्रासून ॥चाल॥
शब्दशस्त्र उपसून घाव घालितेस मैतरणी ॥
कसा तो तड लाविल तरणी ॥२॥
वडील जाऊ आहे घरात ती परपुरुषाला भजते ।
रात्री वैरिण जागृत निजत्ये ॥
भांग सरळ सळसळीत करुन न्हाणवली जशी सजत्ये ।
आपण भलत्यांची घरे पुजत्ये ॥
बरे पण आपले पाहून दूर उभि राहून कुजबुजत्ये ।
उभयता धरावया धजत्ये ॥चाल॥
अहो तुम्हासारिखा भ्रतार मजला हवा ।
कसा ब्रह्मदेव प्रारंभी चुकला जवा ॥
मुळी संग न करता जगी जाहला गवगवा ।
आजवर डाक नाही ठाऊक काढिन रवा ॥
दुधखुळा बुळा पति आवडे ना ह्या जिवा ।
म्हणुन मैत्र म्या सुरेख केला नवा ॥चाल॥
काय करू वैभवास देखत मी नार नवी तरणी ॥
सदा सादर तुमच्या स्मरणी ॥३॥
वेणिफणीच्या मिसे सकाळी दर्शनास येत्ये ।
सुखाने आलिंगन देत्ये ॥
कार्य साधुन उघड न व्हावे किति यास्तव भीत्ये ।
बातमी तुमची नित्य नेत्ये ॥
तुम्ही जितके पाजाल पाणी मी पहा तितुके पित्ये ।
झाली चुकी माफ करुन घेत्ये ॥चाल॥
आलीकडेच घरचे वाटु लागले भय ।
परिहार सर्व हरी करिल निःसंशय ॥
विश्वास असू द्या मजकडे लावा लय ।
दृष्टिस पडतजा का मांडली हयगय ॥
समसमान आपले आहे दोघांचे वय ।
सुख देइन तुम्हाला हा तर कृत निश्चय ॥चाल॥
गंगु हैबती महादेवाची सरस कवन करणी प्रभाकर तप्तर प्रभुचरणि ॥४॥