बाळसंतोष (मोरया गोसाव्यांचा)
आह्मां एकदां मोरेश्वरा ॥
दान देंई तूं सत्वर ॥ बाबा बाळसंतोष ॥
निरसी दुष्ट हा संसार ॥ बाबा बाळसंतोष ॥१॥
प्रपंच शिणलों बहूत देवा ॥
काहीं न घडे रे तुझी सेवा ॥ बाबा बा०॥
ऐसा अपराधी मी देवा ॥ ब.बा बा० ॥२॥
ऐसा अपराधी मी तुझा जन्मोजन्मीं ॥
नाहीं घडलें रे स्मरण नाभीं ॥ बाबा बा० ॥
नको कोप रे धरुं स्वामी ॥ बाबा बा० ॥३॥
तुजविण नाहीं देव दुजा ॥ हेंचि सत्य रे गणराज ॥बाबा बा०॥
चुकवी भव रे मायापाश ॥ बाबा बा० ॥४॥
भव सागर तरावया ॥ उपाय नाम हें मोरया ॥ बाबा बा० ॥
करी मज रे पूर्ण दया ॥ बाबा बा० ॥५॥
तुझे दयेवीण जन्म काय ॥ जैसा प्राणा रे (वीण) देह ॥बाबा बा० ॥
माझा देह रे लावी सेवे ॥ बाबा बाळ० ॥६॥
जरी देवराया कृपा करीसी ॥ मग सार्थक जन्मासीं ॥बाबा बा० ॥
नको चाळऊं जीवासीं ॥ बाबा बा० ॥७॥
माझे पदरीं नाहीं पूर्व संचित ॥ पुरवीं माझें रे मनोरथ ॥ बाबा बा० ॥
तुझें नाम रे दिनानाथ ॥ बांबा बा० ॥८॥
दिनानाथ नाम हें करावें ॥ दिनरंक रे उद्धरावे ॥ बाबा बा० ॥
आपुलें प्रेम रे मज द्यावें ॥ बाबा बा० ॥९॥
तुझें प्रेम जया लाधलें ॥ ते हो संसार चुकले ॥ बाबा बा० ॥
त्यासीं पुन्हां रे नाहीं येणें ॥ बाबा बा० ॥१०॥
मोरेश्वरा तूं माझें सर्व तप जाण ॥
न सोडी तुझें बा चरण ॥ बाबा बा० ॥
ऐसा निश्चय सत्य जाण ॥ बाबा बा० ॥११॥
ह्मणोनियां प्रेम द्यावें झडकरी ॥
दास मोरया विनंती करी ॥ बाबा बा० ॥
दिनरक रे (दिनरंकासी) उद्धरी ॥बाबा बा० ॥११॥
बाबा बाळसंतोष ॥ बाबा बाळसंतोष ॥
बाबा बाळसंतोष ॥ दिनरंक रे (दिनरंकासी) उद्धरीं ॥बाबा बाळसंतोष॥