संगीत आशीर्वाद

(३०-११-१९४१). संगीत : डी. पी, कोरगावकर

१
हांसते मनी डोलते । तव प्रीतीची फुलवेल सखया ॥
नयनी बोले वदनी खेळे
ह्रदयि तव प्रतिमा डुले ॥धृ०॥
राजसा फुलली पहा । प्रणयात ही वसुधा अहा ॥
मुदित होऊनि मजसि मोहुनि
हांसते ते अधरात अपुल्या ॥ प्रीतिची ॥१॥
बोलु मी कुणाची  ।
मनींच्या, जिवाच्या, सुखाशा ।
गुंगवी मज प्रेमगानी ॥ प्रीतीची ॥२॥

२
अंतरिच्या खुणा माझ्या । ओळखसी एकला तू ।
धुंडिती हे नेत्र कोणा । ओळखसी एकला तू ।
थरथरती हे ओठ माझे । ओढते पाऊल मागे ।
भरुनि का ये ऊर माझा ॥ ओळखणे एकला तू ॥१॥
ऐकता चाहूल तुझी । मूक होऊ वाणी माझी ।
परि बोले मी किती मुखानी । ओळखली एकला तूं ॥२॥