संगीत युगांतर

(७-२-१९३१). संगीत : हिराबाई, सवाई गंधर्व, सुरेशबाबू, केशवराव भोळे

१
(राग : यमन, ताल : एकताल)
जनमानसमंदिरात । विलसो रुचिरा प्रशांत ।
मति स्वयंप्रकाशवती । मंगला युगान्तरांत ॥धृ०॥
कुलसाधित वैभवात । न दिसो महती कुणास ।
धृति सेवा, कृति गुणांहि । लाभो प्रभुता जनात ॥१॥

२
(राग : काफी, ताल : त्रिताल)
ललना दिसे सुप्रभाती । नयना तुझ्या दर्पणांती ।
अलकांचिया पाशा धरिता । मृदू त्या होतीं ॥धृ०॥
हसतमुखी ती सन्मुखी राही । लाजुनी वाट पाहीं ॥१॥

३
(राग : पटदीप, ताल : झपताल)
अधिर मन बावरे, घेइ आंदोलने । विविध भावांवरि प्रेमशंकागुणें ॥धृ०॥
दयित ह्रदयांतले अणु जरी लाभलें । स्थल, विसावले मन ।
कान्तागुणचिंतने ॥१॥

४
(राग : काफी देस, ताल : एकताल)
किति सुखकर हा भास । ह्र्दयांतर करि उलसित । जाय विरुनि
सकल ताप मनिचा । हा गोड घ्यास ॥धृ०॥
भ्रमचि रुचिर वाटत हा । जागृति विषसमचि गमत ।
मीलन जसि होत मधुर । जाय विरुनि ॥१॥

५
(राग : मांड, ताल : एकताल)
घेई विहगसम भरारि । मानस हें भारी ॥धृ०॥
उन्मादक गीताचे । छत सुंदर पसरावे ।
वाटे या क्षणि मनास । मन वेडे बाई ॥१॥

६
पदपंकजाते प्रभुच्या वरोनी । मिळतो विसावा भयशंकिताते ॥धृ०॥
नृपती नृपांचा परमेश साचा । झणि देह अभया शरणांगताते ॥१॥