गज्जलाञ्जलि - असे यौवनीं केस कां पाण्ढर...

असे यौवनीं केस कां पाण्ढरे ?
हृदीं प्रीतिची वासना वावरे.

कुणाच्या मुळे लागती स्पष्ट हे
कपाळीं हृदींचे दिसाया घरे ?

जगीं चारुतेची करी दुर्दशा
अशी कोण ती क्रूर भामा बरें ?

अशी मोहिनी ऐक नाही कुणी.
म्हणूनीच सोत्कण्ठ ई बावरें.

मला व्यक्त मूर्तींत ऐका दिसे
पुन्हा हाय तों भास वाया ठरे !

लपण्डाव चाले असा सारखा,
पुढे काय दैवीं कळेना खरें.

वरी कोण या शुभ्र केसांस अन
क्षुधाक्रान्त या मन्द नेत्रांस रे ?

नसे भीति ती, यौवनान्तींहि कां
हृदीं प्रीतिची ही न वाञ्छा मरे ?

१ ऑगस्ट १९३१