गज्जलाञ्जलि - कृतीने तत्त्वकैवारी, महात...

कृतीने तत्त्वकैवारी, महात्मा तोच या कालीं,
जनांचीं सङकटें वारी महात्मा तोच या कालीं.
जयाचें प्रेम हें केवी जगाला आकळी खेवीं,
झिजूनी जन्म - भू सेवी महात्मा तोच या कालीं.
जयांना धर्म - पुण्डांनी बळाने डाम्बिलें दास्यीं,
घरी जो त्यांस पोटाशी महात्मा तोच या कालीं.
पडूं द्या भार त्या स्कन्धीं, न लोपे हास्य आनन्दी,
म्हणो कोणी खुळा फन्दी, महात्मा तोच या कालीं.
कराया राष्ट्रसंशुद्धी पदे सत्याग्रहें युद्धीं,
न सत्तेला विकी बुद्धी महात्मा तोच या कालीं.
ऋताचा घेऊनी ताणा अहिंसेचा जुना बाणा,
विणी स्वाराज्य खादी जो महात्मा तोच या कालीं.

२७ एप्रिल १९२१