गज्जलाञ्जलि - माझ्या हृदयांत तूच राणी !...

माझ्या हृदयांत तूच राणी !
नाही घडणार बेऊमानी,

ठेवूं किति दीस गूज चित्तीं ?
ये आज अखेर आणिबाणी,

वाढे, न शमे तृषा जिवाची
डोळ्यांतिल हें बघूनि पाणी,

वाटे तुज कां बरें कसेसें
वृत्ती मम पाहुनी दिवाणी ?

दे कान, दुजें न मागतों मी,
गातों तव भक्तिचींच गाणीं

देशील जरी प्रसाद थोडा
गाऊनच कां कधी विराणी ?

आता परि ऐकवीं मला मी
ती तीच पुन्हा पुन्हा कहाणी.

माझ्याविण का अडेल तूझें ?
तूझ्याविण मीच दीनवाणी.

घोटाळत तूझिया सभोती
हिण्डे जिव हा नसे ठिकाणी.

स्वातन्त्र्य तुला, कुठेहि जा तू !
मी दास तुझाच गे हिमानी !

आऊं तुज सोडुनी कुठे मी ?
माझ्या ह्रदयांत तूच राणी !

२१ सप्टेम्वर १९२१