गज्जलाञ्जलि - नाही तुझ्या मी पोटया गोळा...

नाही तुझ्या मी पोटया गोळा परी
“आऊ !’ म्हणूनी हाक मारी वैखरी,

नाही तुझ्या दुग्धावरीही पोसलों,
कोठूनि लागे ओढ ऐशी अन्तरीं ?

स्वप्नींहि नाही पाहिलें बाल्यां तुला,
कां भाव बाल्यांतील हा य़ेऊ बरी ?

गेली तिशी लोटूनि अन मी बाल का ?
कां ऊन वैशाखीं नवी वाहे झरी ?

माझे न केले लाड तू केव्हा, तशी
केली तुझीही मी न केव्हा चाकरी,

आश्वर्य की तू द्दक्पथीं येतां झणी
निश्शब्द पूजा मी तुझी चित्तीं करीं,

सन्तुष्ट मी द्दष्टीप्रसादें तूझिया
तत्काल औदासीन्य माझें तो हरी,

माझें तुझें नातें कधीचें कोठलें ?
ही काय माया, योजना वा श्रीश्वरी ?

माझी मला काही कळेना पात्रता.
तैशीच तूझ्या थोरवीची पायरी.

५ जुलै १९२२