नाव घेण्याचे उखाणे

१.
 दारीं होती तुळस । मला गावला कळस । ते ठेवला केळी खांबी ।
केळीचा मऊ गाभा । मी पाडीतें  गोड आंबा । आंबा दिला नणदाहातीं ।
अशी नणंद मनप्यारी । सकाळ उठून करते न्याहारी । अशी जाऊ शहाणी ।
आठा दिवसांनीं घालते पाणी । दारामधीं  आड । वर डाळिंबाचं झाड । त्याचं डाळिंब किती गोड ।
काय बोललं खासं । मला आलं हसं । हसलें गालच्या गालांत । गेलें रंगमहालांत ।
विसरलें मायबाप । बहीणभावाची बुजाली सई । रंगमहालाला भिंगाची साई । सोन्याचं कारलं देवाला वाहिलं ।
****** साठीं नांदगाव पाहिलं ।

२.
माडीवर माडी । तिथं भरला कौलारी बाजार । दगडीचे घेतले करडी ।  त्याच्या घेतल्या अरडी । अरलंसुरलं शिंक्या लावलं ।
शिकं तुटलं मडकं फुटलं । वोघळ गेला देवदारकीं । देवदारकाचा पैका । आणा घालतें ऐका ।
आणा घालतें एक । देवरामाची लेक
आणा घालतें गहीन । तात्याबाची बहीण ।
आणा घालतें हौशी । भाऊदादाची मावशी ।
आणा घालती काशी । लक्ष्मणाची भाची ।
आणा घालती लाडी । भिकाची धोडी ।
आणा घालती पावणी । रामाची मेहुणी ।
आणा घालती तान्ही । मारुतरावाची राणी ॥