कृष्णाचा पाळणा

१
पहिल्या दिवशींचा पहिला मासोळा । गर्भ्या नारीचा ग रंग पिवळा । पिंड घडवितो कृष्ण सावळा । जू जू रे जु जु ॥१॥
दोनव्या महिन्या पदर बंद । चोळी पातळावर काढिला चांद । आई बापाशीं झाला आनंद । जु जु रे ॥२॥
तीनच्या महिन्या कंथाला ठाव । हळदीकुकुवानं ललाट ल्यावं । ओटी भरुनी खोबरं घ्यावं । जु जु रे जु जु ॥३॥
चवथ्या महिन्या कुसव चढ । अन्नापाणीशीं लागना ओढ । कवळ्या पानाशी बांधीती विडा । अबीर बुक्क्याचा उडवीती पुडा ॥४॥
पांचव्या महिन्या पांच फेर न । बाळ देवाशीं जात शरण । सांडलं  मोती घ्याव भरुन । जु जु रे जु जू ॥५॥
सहाव्या महिन्या सया सक्राती । चोळी पातळावर इच्छा पुरवीती । देवीला गोपा मागूनी घेती । जु जु रे जु जू ॥६॥
सातव्या महिन्या सात फेर न । कमरा बांधीती पोलादी विळा । कडो पाजिल्या लिंबाच्या डहाळया । बाळाच्या मुखीं अफूचा गोळा । जु जु रे जू जू ॥७॥

२
कृष्णाचा पाळणा :
पहिल्या दिवशीं जन्मिलं बाळ । कळस सोन्याचा देतोया ढाळ । पडला परकाश तिनीया ताळ । दिप्ती नेत्तर दोनीया डोळा । कसा मारीला बाळाचा काळ । करील भक्ताचा परतपाळ । जु बाळा जु बाळा जुजु रे ॥१॥
दुसर्‍या दिवशीं दुसरा रंग । रुप सावळं गोर्‍याचं अंग । जसं चमकतं आइन्यांतलं भिग । नागिनी पद्मिनी झाल्यात्या दंग येडया गवळणी बाळाच्या संग । श्रीकृष्ण बाळावर शिंपीती रंग । जु बाळा जु बाळा जु जु रे ॥२॥
तिसर्‍या दिवशीं आनंद मोठा । शीता सावित्री बायांनो ऊठा । दान धरम गाईच्या पेटा । खारीक खोबरं साखर वाटा । आयो नारीनों आवा ग लुटा । जु बाळ जु बाळा जु जू रे ॥३॥
चवथ्या दिवशीं चवथी करीती । आठ रंगाच्या बोलावून नारी । पाळणा बांधीला यश्वदा घरीं । त्याला लाविली रेशमी दोरी । जु जु म्हणून हालवितो हरी । पाळणा गातात न्हानाल्या पोरी ॥ जु बाळा जु बाळा जु जु रे ॥४॥
पांचव्या दिवशीं पांचवा राडा । रानसटवीनं येढीला वाडा । लिंब नारळ देवीला फोडा । तान्ही वासरं गाईला सोडा । तिनी सांजाचा अंगारा लावा । तान्ह्या बाळाची दृष्ट हो काढा । यश्वदा मातेचा जीव थोडा थोडा । जु बाळा जु बाळा जु जु रे ॥५॥
सहाव्या दिवशीं कल्लीचा वारा । जशा तुटती अस्मानी तारा । ऊठा सयांनों घागरी भरा । चला घेऊन यश्वदा घरां । कृष्ण जल्मला मान एक हिरा । राधा घालीति वारा । जु बाळा जु बाळा जुजु रे ॥६॥
सातव्या दिवशीं सातवीचें मोल । छप्पन रंगाचं काढीलं गोलं । चारी बाजूला चारीचं लाल । मधीं चंदन होईल मोल । श्रीकृष्ण मांडीवर यश्वदा झुल । जु बाळा जु बाळा जुजु रे ॥७॥
आठव्या दिवशीं आठवा थाट । भुलल्या गवळणी तीनशें - साठ । दह्या- दुधाचा भरुनी माठ । श्रीकृष्ण बाळाची पहात्यात वाट । जू बाळा जु बाळा जुजु रे ॥८॥
नवव्या दिवशीं नवाच फंद । तान्ह्या बाळानं घेतीला छंद । वसुदेवानं सोडवील बंद । धन कीं गवळ्या राजा तूं नंद । जु बाळा जु बाळा जु जु रे ॥९॥
दहाव्या दिवशीं दहायासी राती । तेहतीस कोटी देव मिळूनी येती । तान्ह्या बाळाला वंदूनी जाती । यश्वदा माता डोळ्यांनीं पहाती ।ओवाळूनी टाकिती माणिक मोतीं । जु बाळा जु बाळा जु जु रे ॥१०॥
आकराव्या दिवशीं आकरावा गदा । नित्त पाण्याच्या वाटेला उभा । सोडावा रस्ता जाऊंदे दादा । जु बाळा जु बाळा जु जुरे ॥११॥
बाराव्या दिवशीं बारसावळी । कंसमामाची जळती होळी । अनसूयानं वाजिवली टाळी । नांव ठेवावं वनैयामाळी । जु बाळा जु बाळा जुजु रे ॥१२॥