विजयलक्ष्मीस्तवं - जय पद्मविशालाक्षि जय त्वं...

जय पद्मविशालाक्षि जय त्वं श्रीपतिप्रिये ।
जय मातर्महालक्ष्मि संसारार्णवतारिणि ॥१॥

महालक्ष्मि नमस्तुभ्यं नमस्तुभ्यं सुरेश्वरि ।
हरिप्रिये नमस्तुभ्यं नमस्तुभ्यं दयानिधे ॥२॥

पद्मालये नमस्तुभ्यं नमस्तुभ्यं च सर्वदे ।
सर्वभूतहितार्थाय वसुवृष्टिं सदा कुरु ॥३॥

जगन्मातर्नमस्तुभ्यं नमस्तुभ्यं दयानिधे ।
दयावति नमस्तुभ्यं विश्वेश्वरि न्मोऽस्तु ते ॥४॥

नमः क्षीरार्णवसुते नमस्त्रैल्पक्यधारिणि ।
रक्ष त्वं देवदेवेशि देवदेवस्य वल्लभे ॥५॥

दारिद्‌र्यात् त्राहि मां लक्ष्मि कृपां कुरु ममोपरि ।
नमस्त्रैलोक्यजननि नमस्त्रैलोक्यपावनि ॥६॥

ब्रह्मादयो नमन्ते त्वां जगदानन्ददायिनि ।
विष्णुप्रिये नमस्तुभ्यं नमस्तुभ्यं जगद्धिते ॥७॥

आर्तिहन्त्रि नमस्तुभ्यं समृद्धिं कुरु मे सदा ।
अब्जवासे नमस्तुभ्यं चापलायै नमॊ नमः ॥८॥

चञ्चलायै नमस्तुभ्यं ललितायै नमो नमः ।
नमः प्रद्युम्नजननि मातस्तुभ्यं नमो नमः ॥९॥

परिपालय भो मातः मां तुभ्यं शरणागतम्
शरण्ये त्वां प्रपन्नॊऽस्मि कमले कमलालये ।
त्राहि त्राहि महालक्ष्मि परित्राणपरायणे ॥१०॥

लक्ष्मि त्वद्गुणकीर्तनेन कमलाभूर्यात्यलं जिह्मतां
रुद्राद्या रविचन्द्रदेवपतयो वक्तुं न चैव क्षमाः ।
अस्माभिस्तवरूपलक्षणगुणान् वक्तुं कथं श्क्यते
मातर्मां परिपाहि विश्वजननि कृत्वा ममेष्टं ध्रुवम् ॥११॥