श्रीमध्वस्तोत्रम् - श्रीमदानन्दतीर्थाय कल्याण...

श्रीमदानन्दतीर्थाय कल्याणगुणराशये ।
सर्वदोषादिदूराय नमो मस्करिमौलये ॥१॥
ध्वजवज्राङ्कुशांभोजचिह्नितारुणसत्पदम् ।
पद्मरागारुणलसन्नखराजिविराजितम् ॥२॥
क्रमाल्पवृत्तविलसत्जङ्घायुगलसंयुतम् ।
वलित्रयाङ्कितोदारतनुमध्यविराजितम् ॥३॥
अरिवारिजसल्लक्ष्मलसद्रक्तकराम्बुजम् ।
चारुपीनमहोरस्कं दिव्यगन्धानुलेपनम् ॥४॥
पीनवृत्तायतभुजं चारुकम्बुसुकन्धरम् ।
पूर्णेन्दुकलमुखांभोजं विद्रुमाधरपल्लवम् ॥५॥